जालना. राज्याचे कॅबिनेट मंत्री राधाकृष्ण विखे पाटील यांनी आज अंतरवाली सराटी येथे जाऊन मराठा आरक्षण आंदोलनाचे नेते मनोज जरांगे पाटील यांची भेट घेतली. या भेटीत काल शासन आणि आंदोलन प्रतिनिधींमध्ये झालेल्या चर्चेतील मुद्द्यांवर सरकारने घेतलेल्या निर्णयांची माहिती विखे-पाटील यांनी जरांगे यांना दिली.
भेटीनंतर बोलताना मनोज जरांगे यांनी शासनाने मांडलेल्या निर्णयांचा आणि लिखित मसुद्याचा अभ्यास तज्ज्ञ व अभ्यासकांशी चर्चा करून केला जाईल, त्यानंतर पुढील भूमिका जाहीर करण्यात येईल, असे स्पष्ट केले. त्यामुळे मराठा आंदोलनाच्या पुढील टप्प्याबाबतचा निर्णय काही काळासाठी प्रलंबित राहणार असल्याचे संकेत मिळाले आहेत.
दरम्यान, जरांगे यांनी त्यांच्या प्रमुख मागण्यांबाबत कोणतीही माघार घेतलेली नसल्याचे स्पष्ट केले. सातारा गॅझेटची अंमलबजावणी तसेच मराठा समाजासाठी स्वतंत्र मंत्रालयाची स्थापना या मागण्यांवर ते ठाम असल्याचे त्यांनी सांगितले. शासनाकडून सादर करण्यात आलेल्या लिखित मसुद्यात काही मुद्द्यांवर निश्चित कारवाईचे आश्वासन देण्यात आले असल्याची माहितीही समोर आली आहे.
भेटीदरम्यान राधाकृष्ण विखे-पाटील यांनी मनोज जरांगे यांना आरोग्याचा विचार करून अभ्यासकांशी चर्चा पूर्ण होईपर्यंत सावलीत बसण्याची विनंती केली. उपोषणामुळे वाढत्या उष्णतेचा आरोग्यावर परिणाम होऊ शकतो, अशी चिंता त्यांनी व्यक्त केली. मात्र, जरांगे यांनी ही विनंती स्वीकारण्यास नकार दिला.
“जोपर्यंत मागण्यांबाबत ठोस निर्णय होत नाही, तोपर्यंत आंदोलनाची भूमिका कायम राहील,” अशी भूमिका घेत जरांगे यांनी उन्हातच उपोषण सुरू ठेवण्याचा निर्णय घेतला आहे. त्यामुळे आंदोलनस्थळी तणावपूर्ण पण शांत वातावरण असून, मराठा समाजाचे लक्ष आता शासनाच्या पुढील भूमिकेकडे लागले आहे.
सरकार आणि आंदोलनकर्त्यांमध्ये संवाद सुरू असला तरी महत्त्वाच्या मागण्यांवर अद्याप अंतिम तोडगा निघालेला नाही. त्यामुळे आगामी काळात होणाऱ्या चर्चांकडे राज्यभरातील मराठा समाजाचे आणि राजकीय वर्तुळाचे लक्ष लागले आहे.
