डिजिटल डेस्क, छत्रपती संभाजीनगर: छत्रपती संभाजीनगरमध्ये अन्न व औषध प्रशासनाच्या (FDA) अधिकाऱ्याला संतप्त स्थानिकांनी घेरल्याची धक्कादायक घटना समोर आली आहे. संबंधित अधिकाऱ्याने दुकानदाराला वाचवण्यासाठी लाच घेतल्याचा आरोप करत जमावाने त्याला मुदत संपलेली बिस्किटे खाऊ घालण्याचा प्रयत्न केला. या घटनेचा व्हिडिओ सोशल मीडियावर व्हायरल झाला आहे.
मिळालेल्या माहितीनुसार, एका स्थानिक दुकानातून खरेदी केलेले मुदत संपलेले स्नॅक्स खाल्ल्यानंतर दोन वर्षांच्या मुलाची प्रकृती बिघडल्याचा आरोप आहे. मुलाला चक्कर येऊ लागल्यानंतर कुटुंबीयांनी त्याला उपचारासाठी रुग्णालयात दाखल केले. या घटनेनंतर कुटुंबीयांसह स्थानिक नागरिकांमध्ये संतापाचे वातावरण निर्माण झाले.
तक्रारीनंतर FDA अधिकारी दुकानात दाखल
घटनेची माहिती मिळाल्यानंतर स्थानिकांनी अन्न व औषध प्रशासनाकडे तक्रार केली. त्यानंतर FDA चे अधिकारी संबंधित दुकानाची तपासणी करण्यासाठी पोहोचले. मात्र, तपासणी सुरू होण्यापूर्वीच मुलाने खाल्लेल्या खारट स्नॅक मिक्सची पाकिटे दुकानातून हटवण्यात आल्याचा आरोप स्थानिकांनी केला.
तपासणीदरम्यान दुकानात मुदत संपलेली बिस्किटे आणि इतर खाद्यपदार्थ आढळल्याचे सांगण्यात येत आहे. अधिकाऱ्यांनी काही मुदत संपलेली उत्पादने जप्त केली. मात्र, दुकानदाराविरोधात कठोर कारवाई करण्यात आली नसल्याने स्थानिक नागरिक संतप्त झाले.
‘हे तुम्हीच खा’; जमावाने अधिकाऱ्याला घेरले
दुकानदारावर कारवाई न केल्याने संतप्त झालेल्या नागरिकांनी FDA अधिकाऱ्याला घेरले. संबंधित अधिकाऱ्याने दुकानदाराला संरक्षण देण्यासाठी लाच घेतल्याचा आरोप जमावाने केला.
यावेळी काही नागरिकांनी अधिकाऱ्यासमोर मुदत संपलेल्या बिस्किटांची पाकिटे ठेवली आणि ‘हे तुम्हीच खा’ असे म्हणत त्याला ती खाऊ घालण्याचा प्रयत्न केला. काही जणांनी अधिकाऱ्याच्या तोंडात बिस्किटे कोंबण्याचाही प्रयत्न केल्याचे व्हिडिओमध्ये दिसत असल्याचा दावा करण्यात आला आहे.
या घटनेचा व्हिडिओ सोशल मीडियावर व्हायरल झाल्यानंतर या प्रकरणाची चर्चा सुरू झाली आहे.
