Price Hike From 01 September 2026: 01 सप्टेंबर 2026 पासून सर्वसामान्यांच्या खिशाला मोठी झळ बसणार आहे. सीएनजी-पीएनजी, रिक्षा-टॅक्सी आणि दूध दरात मोठी वाढ झाली आहे. आजपासून लागू होणाऱ्या नवीन दरांमुळे सर्व सामान्यांचे आर्थिक गणित कोलमडणार आहे. 

आंतरराष्ट्रीय बाजारातील गॅसच्या दरात झालेली वाढ आणि मध्य-पूर्वेतील सध्याच्या संकटामुळे आयात केलेल्या गॅसचा खर्च वाढला आहे. यामुळे महानगर गॅस लिमिटेडने (MGL) सोमवारी आपल्या सर्व पुरवठा क्षेत्रांमध्ये सीएनजीच्या दरात प्रति किलो 2 रुपये आणि घरगुती पीएनजीच्या दरात प्रति एससीएम (SCM) 1 रुपयाने वाढ करण्याची घोषणा केली आहे.

सुधारित दरानुसार मुंबई आणि आसपासच्या परिसरात सीएनजीचा नवीन दर 88 रुपये प्रति किलो असेल. हे नवीन दर 31 ऑगस्टच्या मध्यरात्रीपासून लागू होतील, असे अधिकृत निवेदनात म्हटले आहे.

आयात केलेल्या गॅसच्या वाढत्या खर्चाचा फटका

एमजीएलने (MGL) स्पष्ट केले आहे की, सीएनजीच्या मागणीत मोठी वाढ झाली असून, या विभागासाठी आवश्यक असलेल्या गॅसचा एक मोठा भाग आयात केलेल्या स्पॉट रीगॅसिफाइड लिक्विफाइड नॅचरल गॅस (RLNG) द्वारे घेतला जातो.

कंपनीच्या मते, मध्य पूर्वेतील संकटामुळे आंतरराष्ट्रीय निर्देशांकाशी जोडलेल्या गॅसच्या किमतीत लक्षणीय वाढ झाली आहे. यामुळे सीएनजीची वाढती मागणी पूर्ण करण्यासाठी गॅस खरेदी करण्याचा खर्च वाढला आहे. या वाढत्या खर्चाचा ग्राहकांना पुरवठा केल्या जाणाऱ्या गॅसच्या एकूण किमतीवर मोठा परिणाम झाला असल्याचे एमजीएलने म्हटले आहे.

    घरगुती पीएनजी (PNG) देखील महागला

    सीएनजीच्या भाडेवाढीसोबतच एमजीएलने घरगुती पीएनजीच्या (DPNG) दरातही 1 रुपया प्रति स्टँडर्ड क्युबिक मीटर (SCM) वाढ जाहीर केली आहे. सुधारित पीएनजीचे दरही 31 ऑगस्टच्या मध्यरात्रीपासून किंवा १ सप्टेंबरच्या सकाळपासून लागू होतील.

    पुरवठा सुरळीत ठेवण्यासाठी दरवाढ आवश्यक: एमजीएल (MGL)

    आयात केलेल्या गॅसचा वाढता खर्च अंशतः भरून काढण्यासाठी आणि ग्राहकांना सीएनजीचा पुरवठा सतत व सुरळीत ठेवण्यासाठी ही दरवाढ आवश्यक होती, असे कंपनीने सांगितले आहे.

    एमजीएलने म्हटले आहे की, परवडणारे आणि पर्यावरणपूरक ऊर्जा पर्याय उपलब्ध करून देण्यासाठी कंपनी वचनबद्ध आहे. तसेच खर्चात बचत करून ग्राहकांना फायदा पोहोचवण्याचे मार्ग शोधणे सुरूच राहील.

    महाराष्ट्र आणि कर्नाटकात एमजीएलचे नेटवर्क

    एमजीएल मुंबई, ठाणे, रायगड, रत्नागिरी, लातूर आणि धाराशिव तसेच कर्नाटकातील चित्रदुर्ग आणि दावणगेरे या भागांत कार्य करते.

    कंपनी 500 हून अधिक सीएनजी स्टेशन्सच्या नेटवर्कद्वारे 13 लाखांहून अधिक वाहनांना सीएनजी पुरवठा करते. तसेच, आपल्या कार्यक्षेत्रात सुमारे ३० लाख घरांना पीएनजी कनेक्शनने जोडले आहे.

    दूध दरात प्रतिलिटर 9 रुपयांची वाढ -

    सध्या दुधाचा घाऊक दर प्रतिलिटर 93 रुपये आहे. मात्र सप्टेंबरपासून या दरात 9 रुपयांची वाढ करून तो 102 रुपये प्रतिलिटर करण्यात येण्याची शक्यता आहे. दूध हे प्रत्येक घरातील दैनंदिन वापरातील महत्त्वाचे उत्पादन असल्याने या संभाव्य दरवाढीचा थेट परिणाम सर्वसामान्य ग्राहकांवर होणार आहे.

    चहा, कॉफीपासून दुग्धजन्य पदार्थांपर्यंत परिणाम

    दूध महाग झाल्यास त्याचा परिणाम केवळ दूध खरेदीपुरता मर्यादित राहणार नाही. चहा, कॉफी, दही, ताक, पनीर, तूप, लोणी आणि इतर दुग्धजन्य पदार्थांच्या किमतीही वाढण्याची शक्यता आहे. हॉटेल, चहाच्या टपऱ्या, बेकरी आणि मिठाई व्यवसायावरही या दरवाढीचा परिणाम होऊ शकतो. त्यामुळे संबंधित व्यावसायिकांकडून ग्राहकांवर वाढीव खर्चाचा भार टाकला जाण्याची शक्यता आहे.

    रिक्षा-टॅक्सीचे भाडे किती महाग होणार?

    1 सप्टेंबरपासून ऑटो-रिक्षा आणि टॅक्सीच्या भाड्यात सुधारणा (रिव्हिजन) करण्यात आली आहे. ऑटो-रिक्षाचे किमान भाडे 25 रुपयांवरून वाढवून 27 रुपये करण्यात आले आहे. त्यानंतर प्रति किलोमीटरचे भाडे 17.14 रुपयांवरून 18.22 रुपये प्रति किमी झाले आहे. त्याचबरोबर काळी-पिवळी टॅक्सीचे सुरुवातीचे भाडे (पहिल्या 1.5 किमीसाठी) 31 रुपयांवरून वाढवून 33 रुपये करण्यात आले आहे. तसेच, पुढील प्रवासासाठी प्रति किलोमीटरचे भाडे 20.66 रुपयांवरून 21.90 रुपये करण्यात आले आहे.

    तुमच्या खिशावर किती परिणाम होणार?

    सुरुवातीला ही भाडेवाढ खूप लहान वाटू शकते—ऑटोसाठी फक्त 1 रुपया आणि टॅक्सीसाठी 2 रुपये. परंतु, जर तुम्ही रोज प्रवास करत असाल, तर महिन्याभराच्या हिशोबाने ही रक्कम मोठी होते. तसेच, तुम्ही ऑटो किंवा टॅक्सीने लांबचा प्रवास करत असाल, तरीही तुमच्या खिशावर त्याचा मोठा परिणाम दिसून येईल.

    ऑटो-टॅक्सीची भाडेवाढ मुंबईत लागू होणार आहे. हे नवे दर 1 सप्टेंबरपासून लागू होत असले, तरी चालकांना त्यांच्या वाहनांचे इलेक्ट्रॉनिक मीटर कॅलिब्रेट (री-सेट) करून घेतल्यानंतरच नवीन भाडे वसूल करता येईल.